【深入介紹】nu dolphin 100%防水 MP3 player – 游水聽歌終極方案

購買緣起
一路以來,我都係以游水做我主要的運動項目。點解?時間又唔多,你叫我一個星期特登去大埔踏單車?定係去赤柱租隻獨木舟呀風帆玩下。

以前都試過Join California 試下跑下步,舉下鐵咁,雖然比左好多錢,但係都好少去,點解…因為我覺得好迫…好悶…好傻…同好煩……。

最重要係我終於知道自己唔鍾意陸上運動的原因,我好太汗—–仲好唔鍾意D衫濕漉漉咁痴係身既感覺,所以我開始愛上游水。

用游水黎做主要運動又會帶出一個新問題,就係悶……。跑步、玩獨木舟你可以聽mp3;踏單車同行山你可以睇風景。游水你只可以睇住個池底。

直至呢樣野既出現令我游水的衝動直線上升,立即響JCShop用HKD980帶番屋企,為大家介紹———-水中MP3。

外型簡介
跟機有防水耳筒、MP3傳輸線、一出二的耳筒延長線、專用插耳筒連耳綿、少量配件及備用耳塞、疑似眼鏡布、說明書及一條黑色手臂帶。

防水耳筒

MP3傳輸線

一出二的耳筒延長線

專用插耳筒連耳綿

少量配件及備用耳塞

疑似眼鏡布

一條黑色手臂帶

電力及容量
電力方面使用內置電池,官方話可用8小時,充電時間為1.5小時。實際我冇測試過,因為我未可以一口氣游8個鐘頭水。總之我咁耐未試過用到冇電啦。容量有2GB,平均一首192kbps大約6mb,大約可放3百3十幾首歌。真係不斷咁播可以播成日….舊電都頂唔到咁耐。

防水原理
首先整個MP3機用一體化的設計,基本上唔會入水。特別地方係依賴專用的防水耳筒插頭的羅旋紋,佢同MP3機能夠完全吻合,防止水份透過插頭進入MP3機內部。


點一路游水一路聽歌?

佢跟機會有兩條橙色的膠帶,你好似我咁將佢穿入泳鏡條繩道。就係咁簡單。不過當你游水o個時記得要帶好耳筒先好落水。因為如果你耳仔入面有水,又或者個耳筒裡面入左水,你就會乜都聽唔到嫁啦。

其它用途
跟機佢會送左條臂帶比你,你可以帶住佢黎踏單單或者行山。另外個一出二的耳筒延長線,可以比你一邊插佢特製的耳筒,另一邊插3.5mm標準耳筒同朋友一齊share音樂。

操作方法
如圖中一樣,佢只有五個按鈕,包括開關(中間圓點,大細聲及上一首、下一首),就係咁簡單。

過歌同充電方法
由電腦過歌同充電的方法一樣,就係用跟機的USB線插入MP3機內,但要切記要將充電線插到MP3著燈為止,因為聽買野個Sales 講好多人插得唔夠入,mp3機冇著燈。即係叉唔到電。同你想用o個時就冇電用,結果你唯有就咁個頭帶鐵咁齋游,到時唔好話我冇提你呀。

如果你係用WinXP 或者 Vista,唔需要用任何Drive,直插然後抄DFile落去就Play得。所以除MP3外,你仲可以當佢係一個防水MemoryStick。

代理及保養
我睇返個Package,部機係由一間叫科匯創研有限公司Cyber Pacific Technology Ltd.做代理,地址響香港屯門青揚街宏昌工業大廈5樓D室,電話係852-24602080。保養方面機身有1年、舊電就有半年。

總結
我用左唔係好耐大約兩個月左右,100%用係游水既時候,老老實實如果踏單車同行山我洗鬼用成千蚊買個mp3咩,時但買個幾十蚊防水咪得囉。係咪?
另外,我見forum好多人問成千蚊買個游水用mp3值唔值?
我會有以下建議比你:
1.你係咪成日遊水?
2.每次都游20堂以上?
3.你去泳池係去游水而唔係去吹水?
4.多數都係一個人去游水?
如果以上問題你D答案同我一樣全部都係"yes"既話,你絕對贊成你買,包你一定唔會後悔。仲會不知不覺咁就做完運動,話唔定仲會游多幾個堂。
但如果你係o個D鍾意響泳池同朋友吹水多過游既朋友,我就好心叫你唔好買好過,無為倒錢落泳池啦 。

“【深入介紹】nu dolphin 100%防水 MP3 player – 游水聽歌終極方案” 有 2 則迴響

發表迴響