海南島之旅 扎記


點解會去海南島?主要因為我朋友個阿媽冇護照,但我朋友又想帶佢去旅行去搭飛機而且又要平,所以就有左今次既海南島之旅啦。

其實我自己阿媽都叫過我幾次去海南島玩(仲要係免費個隻),我都冇去。因為一來近年去旅行都係返國內,二來聽D朋友講海南島真係冇乜野玩同悶同嘔。所以一直都冇興趣去,心諗住要去都等七老八十先啦。結果竟然要自己比錢去 :Worry:

圖中就係我地坐個架飛機,波音 737-800 客機,去海南島當然係坐細機,細機既唔好處就係唔穩定同噪,但係因為一行得六個位,所以每三個人就有一個窗口位,仲有就係因為乘客少,所以上機落機都會比大機快。

講番行程,基本上係陽光同海灘同陽光同海灘咁。同我D朋友講既一樣。佢唔會有泰國既百貨公司,台灣的夜市,韓國既波鞋、化妝品街。連返大陸至多既名勝古蹟都冇,聽導遊阿Ben講,海南島只係有300年歷史。所以如果你對陽光同海灘都冇興趣既話,你去海南島會慘過坐監。

相中係兩個僅有既景點:博鰲論壇同五公祠個廁所


海南島之出名就係海南島四大名菜,而我地平時食既海南雞飯,其實係響新加坡同泰國黎既。

海南島四大名菜分別係:文昌雞、加積鴨、和樂蟹同東山羊,之於佢地出名既原因我就唔多講,費時大家訓著,有興趣既大家可以問下Google大神。

我地就係呢間野道食

之於好唔好食,我自己就覺得平平試下冇所謂,不過如果你真係想食好野,你都係去番香港既布袋澳食好過。

同場加影椰子雞同錫紙包雞

去海南島買野,大家一定知道買椰子製品,例如椰子做的杯、筷子、胸圍、飾物、手機繩;食方面有椰子糖、椰子茶、椰子雪糕、椰青、椰絲呀咁。
其實海南島仲有其它特產例如;茶葉、可可、胡椒、腰果同橡膠樹。

下面就係我部份手信,朋友唔多所以手信都唔多。

響云云咁多手信之中,小弟強烈建議大家買一隻椰子軟糖,超好食。可惜因為一早送左比人+自己食哂所以影唔到相比大家睇。

雖然唔係去過好多次旅行,不過我自己覺得去旅行去邊都好,最緊要係同一班好朋友or團友去。對於我黎講旅行除左係開眼界、見識一下世界各地既風土人情之外,最重要就係開心。
一班朋友去到一個陌生的地方,談天說地,飲下啤酒吹下水。大家一齊玩一齊笑,先至係旅行最可貴的地方。去邊跟本就冇乜所謂。

好彩既你可以有旅行團中認到你既另一半,或者識多個朋友。就算冇的話,和唔同既人傾下講下都可以令你瞭解日常難已接觸的人的生活體驗同價值觀。

今次淡季去旅行,本來諗住應該會同一班公公婆婆去,點之我地一行18人,除左我朋友的阿媽外,只有兩個比較大的團友。其它的都係後生仔女<—-好多仲細過我。

而且仲有over 10個係女仔黎 :In-Love: ,唔通佢地唔洗返工唔洗返學?後來追查之後先知我地呢團原來係「逃學逃工旅行團」大部份的團友都係讀緊大學既學生,開左學走兩日堂+星期六日=去旅行。當然亦都有請假伴爸爸媽媽既孝順女團友。

今次去旅行團友雖然多後生仔女,但唔知係咪我老左;定係乜野問題,其它團友都好少出聲。開頭食飯個時..真係粒聲都冇。見面時連招呼都冇打 :Zzzzzz: 。最後好興幸都能和我個同房既團友s打成一遍,可惜既係個時已經係旅程的最後一日了。

此情此景更令我懷念之前一齊去北京玩的團友,一齊響旅遊巴上玩啤牌,夜晚又一齊響房玩UNO。我真係好掛住你地呀! :Happy-Grin:

總括來講,海南島雖然冇乜野玩,但係D酒店、泳池、陽光同海灘真係超級正,如果同三五知己一齊響道hea下,吹下水。靜靜地又寫意真係去過去泰國同人迫百貨公司,仲要等女朋友買幾個鐘胸圍底褲。

另外因為冇乜野你買、冇乜野你行。所以消費好抵,今次我淡季去團費1千加機場稅同小費總共2千蚊到。去到又大約洗左1千蚊。三千蚊就可以同你朋友hea足四日。真係唔錯既選擇。

最後為大家送上酒店同沙灘靚景,請笑納 :wub: 。


註:以上部份相片提供原圖下載,請按圖Download。

發表迴響